Nisien.AI i gyflymu ei genhadaeth i wneud y byd yn lle mwy diogel ar ôl cael cyllid o’r Gronfa Buddsoddi i Gymru

Mae Nisien.AI, busnes deallusrwydd artiffisial Cymreig arloesol yng Nghaerdydd, wedi derbyn buddsoddiad o Gronfa Buddsoddi i Gymru £130m Banc Busnes Prydain trwy Foresight Group mewn cyd-fuddsoddiad â Banc Datblygu Cymru.

Sefydlwyd y cwmni gan yr Athro Matt Williams (Troseddeg) a’r Athro Pete Burnap (Gwyddorau Data, AI) sy’n academyddion o Brifysgol Caerdydd, llai na dwy flynedd yn ôl, ac mae Nisien.AI yn defnyddio’r dechnoleg ddiweddaraf i ganfod ac ymateb i niwed ar lein, fel gwrthdaro ar lein, er mwyn hwyluso trafodaeth a sgyrsiau iach.

Daw’r buddsoddiad hwn ychydig dros flwyddyn ers i Fanc Busnes Prydain, a gynorthwyir gan y llywodraeth, lansio’r Gronfa Buddsoddi i Gymru ym mis Tachwedd 2023 er mwyn hybu’r cyflenwad o gyllid cyfnod cynnar sydd ar gael i fusnesau bach a chanolig eu maint ar draws Cymru.  

Mae Nisien.AI, sy’n cyflogi 14, yn gweithio gyda chwsmeriaid allweddol sy’n amrywio o bum prif blatfform y cyfryngau cymdeithasol i frandiau byd-eang.

Bydd y buddsoddiad newydd yn caniatáu i’r cwmni barhau i arloesi a thyfu, gan gyflogi pobl allweddol a chyflymu’r gwaith ymchwil a datblygu er mwyn creu cynnyrch newydd a tharfol, fel HERO Detect, ei gynnyrch cyntaf i gynhyrchu refeniw, sy’n defnyddio algorithmau AI i ganfod a dosbarthu niwed ar draws platfformau ar lein mewn amser real.

Yn ogystal â chanfod ac ymateb i niwed ar lein, mae’r cwmni’n gweithio ar gynnyrch AI newydd sy’n seiliedig ar dystiolaeth wyddonol sy’n datblygu o ran ‘beth sy’n gweithio’ wrth adeiladu lleoedd ar lein integredig a chydlynol. Mae’r cynnyrch nodedig yma’n mynd i’r afael â phroblemau cadw defnyddwyr/cwsmeriaid ar blatfformau’r cyfryngau cymdeithasol a sianeli brand, gan ddefnyddio dull heb sensora sy’n amddiffyn rhyddid mynegiant.

Bydd y cynnyrch yma’n helpu i gymedroli cynnwys a sgyrsiau iach ac integreiddiad cymunedol ar lein. Mae’r swyddogaeth yma’n hanfodol o ystyried y drafodaeth sydd ohoni am ryddid gwybodaeth sy’n hollt barn, lle mae’r opsiwn cyfredol i sensora cynnwys yn llai na delfrydol i’r defnyddwyr, y platfformau a’r brandiau.

Ochr yn ochr â’r buddsoddiad yma, mae Foresight wedi cyflwyno Cadeirydd profiadol, Tony Stockham, i’r busnes. Mae Tony wedi gweithio gyda Foresight ar ehangu busnesau technoleg yn y gorffennol, a bu gynt yn academydd ac yn entrepreneur llwyddiannus ym maes AI.

Bydd y sylfaenwyr, sy’n cymryd rolau Prif Swyddog Gwyddoniaeth (Williams) a Phrif Swyddog AI (Burnap) yn Nisien, yn cadw eu swyddi gyda Phrifysgol Caerdydd hefyd. Cânt eu cynorthwyo gan benodiadau allweddol lefel uwch o’r diwydiant, gan gynnwys Lee Gainer, cyn Brif Swyddog Cyllid Wealthify, sydd wedi ymuno fel Prif Swyddog Gweithredol; Dean Doyle, cyn Bennaeth Cyflawni HateLab, sydd wedi ymuno fel Prif Swyddog Gweithredu; a Rhodri Hewitson, cyn Brif Beiriannydd AM Digital, sydd wedi ymuno fel Pennaeth Peirianneg.